დმანისში უანგარო დონორთა აქცია გაიმართა
ადგილობრივი თვითმმართველობისა და ჰემატოლოგიისა და ტრანსფუზიოლოგიის ინსტიტუტის ერთობლივი ძალისხმევით დმანისში დღეს უანგარო დონორთა აქცია - "გაიღე სისხლი, გადაარჩინე სიცოცხლე" გაიმართა. აქციაში მონაწილეობა მიიღეს მერიისა და საკრებულოს თანამშრომლებმა, დეპუტატებმა, შსს სამინისტროს ქვემო ქართლის დეპარტამენტის დმანისის რაიონულ სამმართველოს თანამშრომლებმა და რიგითმა მოქალაქეებმა. უანგარო დონორთა აქციაში მონაწილეობის მიზანი სისხლის ბანკისთვის სისხლის სარეზერვო მარაგის და მისი კომპონენტების რეგულარული შევსებაა, რასაც სასიცოცხლო მნიშვნელობა აქვს იმ ადამიანებისთვის, მათ შორის მცირეწლოვანი ბავშვებისთვის, რომლებსაც სისხლის გადასხმა ყოველდღიურად ესაჭიროებათ. დმანისის მუნიციპალიტეტის მერმა გიორგი ტატუაშვილმა აღნიშნა, რომ მუნიციპალიტეტი ყოველთვის მზად არის თანადგომა გამოუცხადოს და ჩაერთოს მსგავს კეთილშობილურ აქციებში. ჰემატოლოგიისა და ტრანსფუზიოლოგიის ინსტიტუტის მიერ მოწოდებული ინფორმაციით გარდა რეციპიენტისა, სარგებელს სისხლის დონორიც იღებს, რადგან სისხლის გაცემის პროცესი სისხლში ახალი უჯრედების წარმოქმნას უწყობს ხელს, რის შედეგად სისხლი ახალგაზრდავდება. დონორთა მიერ ჩაბარებულ სისხლს კომპლექსური ანალიზატორების წყალობით, ფართო სპექტრის, მაღალი ხარისხის გამოკვლევები უტარდება.